元州邨行人路 變私人花圃
深水埗元州邨居民何先生發現，元豐樓對開行人路擺放多達廿盆盆栽，部分植物更高過成年人，質疑食環署縱容市民違規佔用公共空間栽種私人植物，「行人路係公眾地方，有人將啲私人盆栽種晒喺公家地方，有積水又有蚊，食環署有咩理由唔去理？」何更曾目擊有鄰近店舖職員淋花、施肥，令馬路旁充滿積水，要求當局加強執法。
食物環境衞生署發言人指出，派員巡查期間發現行人路上有盆栽，但未有造成積水，已向物主發出口頭警告，並要求將盆栽移走。
「都係《東方日報》做嘢有效率，一投訴完啲盆栽就移走晒！」何先生不滿食環署「唔投訴就唔理」的官僚處事方式，要求當局正視區內環境衞生情況。