政情：廣西專列團 馬鴻銘帶隊
城中名人搭飛機當食生菜，但講到坐十幾個鐘長途火車，就未必個個有經驗。今個月十七日復活節前夕，「玩具大王」蔡志明女婿馬鴻銘（John）及囝囝蔡加讚（Karson）將帶五百幾名青年到廣西柳州交流，今次唔係包機或坐巴士，而係到深圳搭專列火車直奔柳州，車程約十四小時，夠晒特別。
「未試過搭咁長途火車」
呢個名為「共和國之旅－桂港青年共築中國夢」廣西專列團，係由九龍社團聯會等九個團體合辦，阿John做會長嘅青年議會有份合辦，所以由佢帶隊做團長，副團長包括九龍樂善堂前主席劉文文（Lisa）及Karson。阿John同Lisa都話，咁大個人未試過搭咁長途火車，當日晚上八點開車，即會喺車上過夜，阿John會帶埋太太蔡加敏一齊去，仲打算成晚唔瞓。不過，貪靚嘅Lisa就話一定要瞓，唔係翌日一對熊貓眼點見人喎！