身在美國嘅「李漢奸」民主黨創黨主席李柱銘同「民主阿婆」前政務司司長陳方安生，呢趟美加「唱衰香港」之旅日日新鮮。尋日我哋講到呢兩粒已被老美棄用嘅舊電池，猛呻遭老美冷待，但一邊呻，一邊又再接再厲，出席美國國家民主基金研討會討論香港民主，講講吓仲燒埋台灣嗰疊。
民主阿婆喺研討會向老美告「御狀」，話中央試圖以經濟甜頭破壞香港「兩制」，令國際社會、特別係年輕人反感。講講吓仲燒埋台灣民眾佔領立法院事件，話呢次抗爭清楚反映部分民眾認為擴大經濟往來會影響台灣核心價值。莫講話喺台灣，民主阿婆就算喺香港都只不過係過氣嘅前高官，有咩資格高調月旦台灣政事？仲要借台灣反服貿嚟唱衰香港，真係惟恐天下不亂。
二人仲齊聲讚揚美國駐港總領事夏千福，就政改為佢哋發聲，但就不滿英方保持沉默。不過，鬧還鬧，作為「港英餘孽」當然幫英國兜番啦，話相信係英國擔心言論會影響中英貿易關係喎，真係忠心護主！佢哋喺美國當地本月三日中午，會繼續行「孖咇」出席國會聽證會，順道「叩見」當地官員，討論香港民主發展形勢，唔知佢哋仲有咩新觀點唱衰香港呢？