政情：嫻姐接班人超級難揀
距離下屆立法會選舉仲有兩年，但各黨派已經部署各選區擺位及超級區議員人選。有消息話，上屆當選為超級區議員嘅工聯會（工記）榮譽會長陳婉嫻唔係太想競逐連任，但又青黃不接、後繼無人，工記到依家仲未知道最後係咪要嫻姐再多選一屆。不過，聽聞工記內部就有人提議，可以畀港島區直選議員王國興（阿王）及九龍東直選嘅黃國健（KK）試吓接棒，但可惜兩人各有好壞，要雕琢吓先成大器。
傳阿王今屆後退休
先講阿王，佢最初以勞工界功能界別進身立法會，之後再轉戰直選，成功在新界西當選，今屆更勇闖港島區開荒，成功奪得議席，為工記開創神話。不過，據聞阿王喺工記內部講明做埋今屆就退休，但工記啲元老就提出要佢開拓埋九龍西呢個區。有人認為，咁樣對阿王實在太苛刻喇，所以建議佢接棒代嫻姐出選超級議席。不過，翻查前年立法會選舉記錄，阿王又未能好似嫻姐咁開拓到工記支持者以外嘅票源，即係話阿王有知名度係唔夠嘅。
其實阿王未落港島區前，前年喺立法會審議替補機制「拉布戰」期間，豪言會「日以繼夜、夜以繼日，再日以繼夜、夜以繼日同泛民玩落去」，其後又用毛筆寫出「日以繼夜、夜以繼日」八字，因而增加咗人氣，期後就為工記開拓埋港島呢個新區，證明呢啲宣傳都起到一定作用。不過，今屆立法會會期將近過咗一半，但仍未見阿王出招，莫非佢真係諗定退休？
KK落區被「點錯相」
至於KK又點呢？工記中人透露，原來有唔少街外人都叫錯KK做阿王，皆因兩人個名有啲似喎，而最搞笑嘅一次，就係當KK去支持某一建制派候選人參與區議會補選時，遇到「調理農務蘭花系」支持者叫罵，佢哋仲不斷用粗口去鬧KK，點知呢班人竟然係指住KK鬧「王國興」，搞到KK要澄清自己個名喎。鬧都鬧錯，真係好打有限，講嘅係KK。如果工記要派阿王同KK出選超級區議會，就要幫阿王開拓票源，幫KK提高知名度嘞！