中環出更：陳家珮被「問候」 葉劉教答「多謝」
南區區議會海怡西選區補選上月底落幕，新民黨派出政壇新丁陳家珮（Judy）出戰，即成功擊退民主黨「老鴿」單仲偕，實力不容小覷。不過，Judy「升呢」成為區議員唔夠兩星期，就被卓妮撞到佢喺中環ifc商場「濕平」，唔通區議會事務冇嘢忙？Judy連聲否認，話依家幾乎日日開會冇停手，只係襯空檔出來食個晏，仲向卓妮分享選舉期間嘅「洗樓」秘笈添！
Judy坦言，自己始終係選舉初哥，落區拉票期間遇過唔少「奇難雜症」，好似有一日孖住黨主席葉劉淑儀到區內茶樓「洗樓」，大部分居民都畀面禮貌回應，惟獨有枱茶客發難向佢爆粗，Judy當堂被嚇到不知所措，仲諗住硬着頭皮繼續向對方拉票。不過，當時葉太一手拉走Judy，事後仲教精佢遇着呢類場面，最緊要保持笑容同講「多謝」，無謂同呢啲人理論喎。
為海怡西補選瘦咗個碼
葉太經歷過立法會選舉洗禮果然脫胎換骨，臨走前仲專登返去嗰枱茶客講聲拜拜，認真襟撈。另外，卓妮仲發現Judy選舉後瘦咗成個碼，原來佢為咗選舉瘦咗七、八磅，但佢似乎好開心，希望磅數唔會反彈咁話。
卓妮