中環出更：「神女二號」駕到嚴禁手機
港區婦聯代表聯誼會早前舉辦「國際婦女高峰論壇」，探討婦女權益及夢想。晚宴期間，卓妮見一眾姊妹湧埋去同一位女士影相，細心一望，原來係去年六月完成神舟十號與天宮一號對接的飛行任務、有「神女二號」稱號嘅中國第二位女太空人王亞平。當大家拎起智能手機打算同偶像合影時，主持人就不停提醒大家只准用相機，禁用手機，搞到粉絲們惟有搵大會攝影師幫手，究竟點解呢？
多輻射 拍照僅限相機
邀請王亞平來港嘅港區婦聯會長王楊志紅（紅姐）解畫話，咁做係為咗保護王亞平嘅身體，事關航天員團隊醫生交代話，王亞平升空後身體承受咗大量幅射及壓力，三年內都要特別觀察及照顧身體，難怪當晚佢好似國寶咁被呵護嘞。王亞平喺論壇上分享參航天訓練嘅艱辛，全靠使命感及責任感支持佢完成重任，紅姐聽完好感動，打算再搵佢來港同學生分享。
講番晚宴現場，卓妮見食物及衞生局副局長陳肇始（Sophia）同維多利亞教育機構總校長孔美琪（Maggie）雞啄唔斷，原來食衞局成立咗個委員會推廣母乳餵哺，Maggie都係成員之一。Sophia話香港媽媽喺BB初生時嘅哺乳率高達八成，但返工後就急跌至一成九，佢希望諗吓計喚起社會關注。
Maggie就話，若要推廣母乳餵哺，僱主支持好重要，佢又提到香港產假只得十星期，比新加坡嘅十六星期、韓國嘅十二星期少，所以應立例延長假期以鼓勵生育。環境局前副局長潘潔亦罕有現身，佢話最近寫咗本關於中國環境問題嘅書籍，希望從政者搵對策改善問題喎。
卓妮