政情：議員濫問幾廢都有
每年財政預算案公布後，立法會議員都可以就預算案內各分目向政府部門提問，但近年「濫問」情況愈來愈嚴重，今年就有高達六千八百多條問題，有啲問題實在令人啼笑皆非，好似地產及建造界議員石禮謙（大舊石）問康文署新種植物嘅「存活率」，議員陳克勤（克勤仔）就問全港公園水池到底有幾多隻龜。其實呢啲騎呢問題只係冰山一角，真係難為班公務員要捱更抵夜回答問題。
康文署:根本冇養龜
大舊石平時最鍾意關注經濟問題，估唔到佢對園藝都咁有興趣，但佢似乎冇乜研究，竟然問康文署新種植物「存活率」有幾高。聽到呢條問題，政府中人可能O晒嘴，因為每種植物都有唔同生命周期，開花結果、凋謝枯萎又係大自然定律，邊有得計算存活率呢？康文署惟有答佢植物存活受多種環境、氣候因素影響，所以署方並冇制訂「存活率」指標。
向來關注小動物權益嘅克勤仔，就問康文署有冇統計過署方轄下公園水池到底有幾多隻龜，同埋啲龜有幾多隻係被放生或遺棄。康文署真係冇佢咁好氣，好老實不客氣話政府所有公園水池根本冇養龜，只係市民遺棄啲龜喺水池，所以署方冇相關統計數字。面對呢類咁騎呢嘅問題，唔知康文署署長馮程淑儀好嬲定好笑呢？
長毛問UＦＯ有回音
講開騎呢問題，不得不提「長毛」梁國雄早前問政府過去多年接獲不明飛行物體（ＵＦＯ）嘅報告，雖然長毛好大機會問嚟用作稍後「拉布」之用，但政府部門都好認真回答，表示過去最多市民發現ＵＦＯ係大埔區，合共有二十五宗報告，其次係元朗同灣仔，分別有十三宗同十二宗。
至於體育、演藝及文化出版界議員馬逢國，就問公共圖書館過去一年買咩書籍最多。不過，結果都幾令人意外，估唔到中文成人書籍除咗考評局出版嘅文憑試「雞精書」外，第二位就係亦舒寫嘅《紅杏與牆》，一共買咗二百零四本，唔知康文署覺得呢本書有咩過人之處呢？兒童書籍就以漫畫為首，第一位係《多啦A夢》系列，夾夾埋埋買咗成千本書。
不過，都有議員值得一讚，好似秘書處回覆有關議員處理申訴個案嘅數字，其中梁君彥、梁繼昌、范國威、陳恒鑌及王國興五人，平均處理咗近四百個申訴，相信選民心中有數。