中環出更：事業女性剛柔並重
邊個話「三高」女強人容易變剩女？城中唔少專業女性不但事業有成，相夫教子亦頭頭是道。香港工商界婦女紀念「三八」國際婦女節籌備委員會日前在港島一間酒店舉行聯歡晚宴，香港女律師協會一眾靚靚成員表演唱得又跳得，彰顯專業女性剛柔並重嘅一面。晚宴仲有同為律師嘅中華總商會永遠名譽會長蔡冠深太太蔡關穎琴（Janice）表演耍太極，演出有板有眼。
今年已經係香港女律師協會第三次在晚宴上表演，繼去年表演《唐伯虎點秋香》之後，今年佢哋齊齊着上古裝，邊唱邊跳《皆大歡喜》，盡展女性嬌柔美態。
唱得跳得 仲識太極
有份演出嘅副會長趙文琪、成員劉佩琪及黃琦雅話，作為律師大家平日都好忙，但仍堅持抽時間排練歌舞實在非常難得。佢哋今次排練接近兩個月時間，所有排舞、錄音等工作都係大家一手一腳包辦，真係擺少啲心力都唔得。
至於Janice亦唔輸蝕，當晚表演耍太極嘅動作好熟練。佢話雖然耍太極動作緩慢，但其實消耗好大體力，耍咗一陣就已經出晒汗嘞。日前佢為咗呢個表演練習咗五次之後，仲有朋友話佢瘦咗添，氹得佢好開心。
夫妻之道 貴乎尊重
當晚活動仲有其他婦女界代表出席，好似香港中國婦女會主席蕭詠儀（Sylvia）及會長源林潔和，身為專業女性，佢哋亦絕對唔會忽略家庭嘅重要性，仲同大家分享與丈夫相處之道。Sylvia話，即使喺外面係個女強人都好，返到屋企對住丈夫就一定要體貼和互相尊重，而出到外面就要盡量唔好搶晒丈夫風頭，因為無論男女都一樣愛面子喎。
卓妮