政情：食到腳痛 戴耀廷變「跛腳鴨」

和平佔中秘書處尋日喺添馬公園進行第一場非暴力抗爭集訓，雖然參加人數比預期少，但佔中二子仍然有落場同參加者一齊集訓。不過另一佔中發起人戴耀廷就要坐埋一邊齋睇無得「瞓草地」，事關佢隻左腳痛風發作，搞到佢一路行一路痛，嚟緊幾日都要揸住支拐杖扮跛腳鴨。戴耀廷解釋，痛風係因為早兩日食咗個蜆肉意粉，引致尿酸積聚。佢話知道自己一食海鮮就會發作，不過佢當日望住嗰蜆肉意粉，同自己講食少少無問題，點知都出事。佢大嘆自己應該響應泛民主派號召嘅絕食行動，咁就唔使因為「為食」而惹禍上身。