中環出更：堅持餵母乳 潮媽不遠遊
「跳水公主」郭晶晶誕下兒子霍中曦後，紮紮跳形象搖身一變做「潮媽」，湊仔經不離口。尋日以「健康大使」身份出席港島婦女聯合會慶祝三八婦女節分享會，坦言湊仔日子雖辛苦，卻好幸福。晶晶凡事親力親為，堅持餵母乳。聽聞早前佢本來想趁聖誕節飛往法國出席交流活動，但為免囝囝無新鮮人奶食，寧願唔去，你話母愛幾偉大!
素顏嘅晶晶尋日暫且放低囝囝，現身分享會大談身心靈健康之道。見晶晶手挽意大利名牌手袋，潮味不減。提起兒子，佢雙眼笑意盈盈瞇成一線。晶晶話，生仔前後心態分別好大，以前總覺得自己係大細路，做人阿媽後，責任感大咗，阿囝每日嘅成長片段，佢都唔想錯過。就算霍家傭人多到排到出門口，晶晶依然湊仔、餵奶、換尿片一腳踢，每日仲抽時間做運動。
晶晶 張雅麗放棄訪法
偉大嘅唔只晶晶，生咗B仔五個月嘅港島婦女聯合會主席張雅麗（Carol）話，數月前本來計劃同晶晶齊出席香港青聯去法國嘅交流活動，雖然行程只得五日，但兩人諗到囝囝幾日無新鮮人奶食好慘，最終齊齊放棄喎。
除咗晶晶，「韓國辣媽」鄭多燕同前港姐楊婉儀（Winnie）都獲委任為該會「健康大使」。「辣媽」嘅勁爆舞步深入民心，五月佢會同四千名婦女齊跳健身操，Carol都話要跳埋一份，事關生仔後纖腰不再，要學番兩招踢走肚腩贅肉。講到湊仔，Winnie年前專登去讀兒童心理學，搵埋一對子女做「白老鼠」，發覺所學幾有用，索性開埋幼兒院同幼稚園，過吓校監癮。
卓妮