政情：新民黨副主席投資育馬
做翡翠生意嘅仁濟醫院前主席鄭承隆（Edwin）沉寂咗一排，原來佢搞緊育馬生意，打算喺澳洲買牧場，自己培育馬匹，幫馬主由物色靚駒、訓練到退役照料，一切包搞掂。咁咪轉型做馬販？Edwin笑笑口話：「可以咁講！」Edwin身兼新民黨副主席，佢唔使幫忙黨務咩？Edwin哈哈笑咗兩聲，冇正面回答，強調會繼續做好地區工作。
雖然Edwin做咗多年馬主，但對馬匹有興趣都係最近嘅事，今個馬季更加未錯過任何一個賽馬日。佢發現好多公務繁忙嘅馬主經常隔山買馬，淨係睇住張相就決定買唔買，似足玩神獸卡咁兒戲。所以佢拍住識馬好友葉俊榮（Damian）大搞一條龍服務，仲打算斥資四千多萬元喺澳洲維省買二百幾公頃牧場添！
Damian喺馬會做過十幾年，曾任高級馬房經理，對馬匹自然好了解。Edwin話，咁做有望降低馬主買馬成本，增加新血加入做馬主，從而提高馬會收入，咁馬會就有更多善款撥作慈善用途，都算係做善事吖。