政情：大讚CY田少變乖？?

指梁處理雙非問題好過貪曾

CY當選特首已兩周年，向來對CY彈多過讚嘅田少，尋日接受電台訪問時自動波話，一年前仲對CY有好大意見，但一年過去，卻有另一番見解。佢話CY做咗兩年特首，雖然喺政治、經濟方面未算交到功課，但從民生方面，CY就做咗唔少嘢得到市民認同。其中處理雙非問題，田少就仲形容CY做得好過「貪曾」前特首曾蔭權爵士，力撐CY夠膽冒被市民司法覆核嘅風險，都禁止雙非孕婦來港產子。佢又讚CY能夠幫助弱勢社群，好似長者生活津貼就係最佳例子。

最近港大民調再被成為熱門話題，所以節目主持人索性叫田少為CY打分，以往多數批評CY唔合格嘅田少，尋日比分變得好手鬆，話以過去兩年政績嚟睇，CY整體評分高過五十分、合格有餘喎！嘩，如果唔係親耳聽到呢番說話，真係唔相信出自田少把口。

不過，田少都唔係一味讚，佢話CY喺政治、經濟上就要繼續努力，尤其對財金官員班底組合非常擔心，因為主管香港經濟發展嘅蘇錦樑只係一名律師，而主管金融嘅陳家強又係大學教授出身，負責土地發展嘅陳茂波更係一名會計師，佢寄語CY要多聽商界意見，否則未來日子依然唔易過喎。

潑阿松冷水 間接幫特首連任

講完民生議題，田少又提到近日動作多多、疑似參選特首嘅梁錦松，一語道破阿松嘅弱點，話阿松熟悉財經金融，又有國際視野，冇乜人會質疑阿松嘅能力。不過，佢擔心阿松多年來幫唔少美國大企業打工，仲要做最高層位置，中央會唔會信任呢個同美國關係咁密切嘅人呢？田少表面上潑阿松冷水，但間接幫CY連任排除對手障礙。

田少忽然變乖乖，係咪北京兩會後遭人訓示呢？田少就話冇咁嘅事，佢透露自己喺兩會期間全程留守北京，真係冇京官搵佢傾偈喎！究竟田少葫蘆內賣咩藥，相信好快就會知道。