中環出更：前「鑊」可鑑 高永文不遠遊
唔少政界中人都鍾意去歐洲旅行，但食物及衞生局局長高永文就自爆好耐都冇去過歐洲旅行，皆因擔心如果香港出現突發事故需要處理，就唔可以喺短時間內飛返香港。佢話依家最遠都只係夠膽去東南亞旅行，相信要留待卸任後先有得去長途旅行，同前局長「廢鑊」周一嶽嘅表現真係天淵之別。
以防香港爆突發事故
高永文解釋，周一鑊在任時試過同老婆去長途旅行，點知撞正香港爆發豬流感，搞到要搭成十幾個小時飛機返港主持會議，真係等得佢返嚟都蚊瞓。為咗唔好重蹈廢鑊覆轍，高永文依家連放假都唔敢離開香港太遠，對上一次同太太去旅行都係揀馬來西亞檳城，貪佢坐幾個鐘機程就到。
就算係平時要履行局長職責外訪，高永文都唔去得太遠，最遠都係去過英國。不過，五月喺瑞士日內瓦舉行嘅世界衞生大會，佢就點都要代表特區政府出席嘞。
卓妮