政情:霍震霆快閃 避談換屆風波

港協暨奧委會近期因為換屆選舉而是非不斷,尋日港協一班高層出席體育界春茗,會長霍震霆(Tim霍)、副秘書長王敏超等人自然成為傳媒追訪對象。Tim霍今次競逐連任,又係唯一候選人,難怪佢心情輕鬆話,今次選舉唔會因為外界關注而有特別安排,一切按正常程序進行。但被問到選舉時間及地點時,佢就耍太極避談,後來索性溜之則吉。據講選舉將喺明天下午五點半鐘喺港協總部舉行,成個體育界都知,唔明點解Tim霍咁神秘囉。

港協否認「度身訂造」指控

今次是非主角之一係Tim霍嘅大仔霍啟剛,有人爆料話啟剛五年前當選港協副秘書長時,未經正式投票,亦唔符合做過兩屆執事嘅參選資格,於是港協去年急改章程為啟剛度身訂造。港協就發聲明否認,並指有報章不實報道,強調候選人只需曾任職港協常務代表四年,或現任常務會議代表即可參選,此規定早於○四年生效,更遑論係為某人度身訂造。

今次選舉除咗九位副會長候選人爭八個位外,其餘職位全部都唔使爭就自動當選,包括啟剛在內。唔怪得角逐副會長嘅胡曉明尋日出席活動時,都不停打電話拉票,仲話自己已經服務咗體育界四十年,粉絲亦唔少,但現實係啲人「識你唔代表一定選你」!

第一手消息請下載on.cc東網iPhone/iPad/Android/Windows Phone Apps