政情：中環出更：陳淑莊舉《中紙》 籲「取消佔中」?
被指雷聲大、雨點小嘅「佔領中環」行動（佔中），尋日舉行義工隊起動大會，兼同時宣布佔中月刊《中紙》正式面世，初版大約印兩萬份，隨義工隊喺街站派發。不過，《中紙》呢個名聽落好似平日舉起代表粗口嘅「中指」，封面雀仔嘜頭更被「斷頭」，同佢哋強調嘅「和理非非」（和平、理性、非暴力及非粗口）唔多夾喎。
佔中辦報玩噱頭
創刊號封面仲打正旗號宣布「取消佔中」添，究竟仲係咪佔中？不過，打開《中紙》睇吓就知「取消」佔中只係噱頭，內文標題仲寫到明「除非有真普選，中，實佔！」真係愈搞愈複雜，愈搞愈混亂！
對於《中紙》嘅由來，負責編製《中紙》嘅成員徐少驊解畫，話《中紙》可解作宗旨、中止又或舉起代表粗口嘅「中指」，隨意解讀都冇問題喎。好似「中止」社會嘅不公義、舉起「中指」向政府說不，甚至揸緊佔中「宗旨」都得。不過佢哋話《中紙》其實只係解「佔中嘅報紙」。咁都得，又算唔算係「語言藝術」呢？
講番佔中個義工隊，目前規模大約二百人，分別負責街站運作同擔任商討日促導員等，啱啱去完台灣立法院聲援「反服貿」學生嘅前立法會議員陳淑莊都係義工隊一分子。
卓妮