政情：中環出更：百仁慈善跑名人舉家出動
百仁基金尋日舉行第二屆「beHERO」慈善跑，一眾名人換上運動裝束，實行以跑步親身宣揚健康訊息。今年慈善跑分咗十公里及三公里親子組進行，唔少名人都一家大細參與，過咗一個健康又可做善事嘅家庭日。
百仁基金主席李文俊（Raymond）好開心話，今年參加人數增加至五千人，比去年多咗超過一千人，而且參加者趨向年輕化，為活動增添唔少生氣。佢希望慈善跑可以變成每年一度嘅盛事，並增加半馬及全馬組別。雖然Raymond自稱每個星期都會堅持跑步半小時以上，但佢尋日就因為掛住招呼賓客，無緣落場大顯身手。
身體力行 享天倫樂
尋日上午七時左右，一眾參加者已經聚集喺迪士尼樂園起點，卓妮見唔少都係全家上下齊出動，身體力行為慈善出力。好似百仁基金副主席顏志永（Roger）、羅詠詩（Anthea）及陳稼晉，就同家人一齊參加三公里親子賽。Roger除咗同太太及囝囝一齊跑外，仲帶埋身兼中華廠商聯合會副會長嘅媽媽顏吳餘英、家姐顏明潤、妹妹顏明秀及爸爸等家庭成員一齊支持，非常難得。
至於Anthea就更加醒目喇，事關佢活動前一日就已經帶咗囝囝入去樂園玩咗一晚，尋日朝早一起身就可以同丈夫及囝囝一齊跑步，做善事之餘仲可以過一個溫馨嘅假期。同場仲有香港青年聯會賢慧社召集人周沁（Dorothy）同好姊妹Isabelle拍住上跑，Dorothy首次參加十公里跑，但平日有做開運動，最後輕鬆以一小時零九分完成路程。
卓妮