本報《功夫茶》日前話，今時今日嘅香港真係無奇不有。電台炒人又好，報館高層遇襲又好，仲未搞清楚來龍去脈，就被人上綱上線扯到打壓新聞自由，簡直九唔搭八。反而正義傳媒長期受到港府部門針對及打壓，呢班政客就詐睇唔到，扮晒鵪鶉。
議員不務正業，淨係掛住抽水做騷，高官一味口水多過茶，抱殘守闕，得過且過，理財冇方，守財有法，自己富貴，民生凋敝，香港會有明天，咁烏鴉都變鳳凰喇！
近日香港，日日嘈喧巴閉，眼前台灣啲大學生佔領立法院，搞到馬英九十分頭痕；於是啲政客又出來興風作浪，揚言除了佔中，又不排除效法台灣佔領立法會。嘩！咁搞法最慘唔係我哋小市民，相信係議事堂班尊貴嘅議員同高官。點解咁講呢？咪正如《功夫茶》所指嘅「議事堂上怪事多」囉！若然啲後生仔佔據立法會，有啲議員就失咗個掟嘢做騷嘅舞台，有啲議員就冇咗個咁舒適嘅環境上網睇艷照，有啲高官又冇得利用咁好嘅黃金時間上網睇吓股票走勢，亦有啲議員冇得瞓到口角流晒白泡……
所以話佔乜都好，佔立法會老朽第一個反對！少咗咁多娛樂性豐富嘅經典節目，我唔肯過你哋！香港已經唔係七、八十年代嘅香港，再講優勢就與時代脫節喇，所謂「政改年」，得個嘈字；即使佔了立法會也不會有彩虹！
走筆至此，諗起閻錫山呢個北洋軍閥，能寫詩，晚年亦自作輓聯：避避避，斷斷斷，化化化，是三步功夫；勉勉勉，續續續，通通通，為一等事功。擺脫開擺脫開，沾染上洗乾淨很不易；持得住持得住，掉下去爬上來甚為難。講真，這輓聯雖使人莫測高深，最後四句若用來形容香港目前惡劣環境，卻十分富有啟思！香港若再永無寧日的鬧下去，百劫蒼茫，苦的只會是基層民生。