政情：議員自爆吃「牛肉乾」歲月
行政會議成員兼立法會議員林健鋒（Jeffrey）去年七．一喺九龍灣衝紅燈和逆線行車，尋日被判危險駕駛罪名成立，罰款八千元兼停牌半年。唔少議員聽到罰則後都大呼Jeffrey今次好好彩，又自爆多年來揸車都收過唔少「牛肉乾」，但就未試過被人告到上法庭喎。
試過忘戴安全帶
體育、演藝、文化及出版界議員馬逢國就自爆多年前試過不小心駕駛，但由於年代久遠，所以唔係好記得當時發生咩事。佢話依家揸車都冇發生過不愉快事件，如果知道要出席活動時會飲酒，就會叫司機送佢返屋企，以防萬一。保險界議員陳健波就憶述初初揸車嗰陣，曾經試過因為唔記得佩戴安全帶而食咗張「牛肉乾」，依家出入都有司機接送，唔擔心會再被扣分。
至於議員單仲偕早日前揸車時被一輛巴士從後猛撞，私家車尾部撞到凹晒，但佢話自己多年來甚少發生交通意外，淨係久不久就會因為超速駕駛而被扣分。雖然扣夠十五分就要停牌半年，但佢話由於記分制度每兩年就會自動取消，所以直到依家都仲有唔少分。