浸會大學一直都想將九龍塘前李惠利校舍用地據為己用，興建中醫教學樓，尋日起仲獲二千人授權，搵咗四十幾人團隊，連續兩日馬拉松式向城規會申述。不過，政府點都唔畀浸大如願，仲將用有關土地改為特殊教育用途，睇嚟都係費事被人話政府向浸大跪低。對於特殊教育用途，浸大校長陳新滋尋日都唔敢話唔好，強調特殊教育好重要，但香港其他地方都可以發展特殊教育學校咁話。佢咁講法，即係暗示叫特殊教育學校過主啫，講來講去都係浸大想要相連地發展囉！
