社民連自成立以來一直走在示威遊行最前線，基本上由籌辦活動到後期支援都係全民皆兵一手包辦，至於會務工作就冇咁多人投入其中。社民連最近就揼主席「長毛」梁國雄嘅心口，首次真金白銀請全職會務幹事，據聞該名新員工更有免死金牌，即係唔使參加示威遊行。
社民連喺官方網頁刊登招聘全職會務幹事嘅特別消息，月薪介乎一萬元至一萬二千元，規定每周工作四十小時，超時工作以假期補償。至於入職要求要中學畢業，工作範圍包括財政出納及紀錄、文書處理及資源管理、活動籌備、對外通訊及對內聯繫等，截止申請職位日期為本月二十四日。
不過，話說回來，加入得社民連參政或做職員，理論上都認同議會內外抗爭路線，加上會務同示威行動有時難以清楚劃線，因此該名會務幹事係咪可以「錫身」不用參與示威遊行，相信依家只係紙上談兵囉！