東網氣勢如虹，讀者熱烈捧場。東方報業集團全力發展新媒體，昨日起全球免費開放《東方日報電子報》一個月，初試啼聲，立刻熱爆全球，瀏覽頁次節節上升，唔到你唔服！
今年適逢東方報業集團四十五周年報慶，為回饋讀者，《東方日報電子報》免費開放，全球華人爭相瀏覽，務求第一時間享受前所未有嘅閱讀樂趣，踴躍程度超乎想像。究竟有幾踴躍？免費開放頭十七小時咋，《東方日報電子報》網站版及App版嘅瀏覽頁次就比上周六全日增加兩倍，連同早前全球免費開放嘅《太陽報電子報》及《好報電子報》，總瀏覽頁次接近五百萬。
話時話，《東方日報》本來就夠晒吸引力，借助電子平台嘅威力，飛渡關山，無遠弗屆，更加係如虎添翼，全球讀者爭相閱覽，證明佢哋夠眼光，真係可喜可賀。功夫茶喺度要真心講聲，多謝捧場！
再提提大家，為配合《東方日報電子報》全球免費開放，東網旗下嘅「東方日報/太陽報電子報」Android App已改名為「東網電子刊物」App，囊括咗東方報業集團旗下刊物嘅電子版，包括《東方日報電子報》、《太陽報電子報》、《好報電子報》、《FLASHoN電子版》同《特刊電子版》，所有刊物內容都係足本上載，同睇實體報刊感覺一模一樣。至於使用方法非常簡單，三星等Android手機用戶只要上Play商店更新「東網電子刊物」App，就可以隨時隨地瀏覽原汁原味嘅電子版報刊。
今時今日，隨着改革開放，經濟起飛，內地同胞民智大開，對海內外訊息求知若渴，「on.cc東網」最啱十三億同胞口味，昨日起隆重推出簡體字版東網大陸網站，同埋「東網大陸」Android版App，創出本港傳媒先河。
即係咁，用緊Android版嘅手機用戶可以先睹為快，先進入Play Store，搜尋「東網」，就可找到「東網大陸」App，點擊「安裝」就得嘅喇。
「東網大陸」唔止資訊齊全，而且致力發展評論，可以講係名家雲集，陣容鼎盛，包括原中國社科院金融研究所金融發展主任易憲容、北京大學國際關係學院教授梁雲祥、香港浸會大學講座教授趙心樹、美國紐約皇后大學政治系講師等，粒粒皆星，佢哋指點江山，激揚文字，讀者定必大有收穫。
仲有吖，全國兩會召開在即，港區人大代表及政協委員相繼赴京，今次有咗東網陪伴，就不愁寂寞嘞。大家都知喇，內地傳媒千篇一律，好多新聞被封鎖，根本同包羅萬有、豐富多彩嘅東網冇得揮。正所謂，「上東網、知天下」，佢哋已經揀咗喇，你又揀咗未吖？嗱，約定大家喇，網上見！