中環出更：釐清標時 金刀梁粉墨登場
關乎打工仔超時補水利益嘅標準工時制度係咪實施，近期頻頻舉行會議。主持會議嘅標準工時委員會主席梁智鴻（金刀梁）早前出席仁濟醫院新春團拜時話，唔少人混淆標準工時同最高工時兩個概念，當務之急係向公眾推廣，佢仲自爆會粉墨登場拍宣傳片添。
為起錨騷出鏡損形象
原來，金刀梁唔係第一次拍廣告，佢笑笑口話：「以前都拍過起錨（騷）。」四年前政府為咗硬銷政制方案而搞咗一場起錨騷，時任行政會議成員嘅金刀梁夥拍同僚胡紅玉等人拍咗段宣傳片，雖然條片令幾位男女主角知名度大增，但起錨騷惡評如潮，結果都係拖累咗形象，得不償失。而喺起錨騷之前，金刀梁亦拍過醫療融資改革宣傳片，都係一鍋冇米粥。
同場仲有公民教育委員會主席李宗德，佢講起本港少數激進人士針對內地客嘅衝突時好感慨，認為香港應該反思。講講吓，佢一見到金刀梁就上前握手密斟，表情好肉緊，唔知係咪打算搵金刀梁幫手拍宣傳片，化解糾結日深嘅中港矛盾呢？
卓妮