有人話，市區重建係一座城市嘅化妝師。計功夫茶話齋，市區重建更加似一支施政卸妝油就真。點解？事關透過重建，大家可以更加睇清楚貧窮舊區嘅真實面貌，睇清楚光明背後嘅陰暗，睇清楚繁華背後嘅危機。呢，市建局最新重建項目就係一個典型例子喇。

市建局啟動今年首個重建項目，準備斥資十八億元重建深水埗青山道及元州街十六幢舊樓，涉及一百零一個業權，共一百六十戶家庭受影響，預計可重建成二百三十個中小型住宅單位。即係咁，當局舊區重建工作一向慢條斯理，呢啲舊樓有幸被揀中，唔係冇原因嘅，本報記者實地視察過，發現重建區至少有兩大特色。

第一個特色係充斥大量「層層疊」僭建天台屋。好多人應該玩過層層疊，一條條小方木左疊右疊，砌上砌落，砌到最後搖搖欲墜，睇見都牙煙。今次納入重建計劃嘅舊樓就係咁嘞，樓齡接近六十年唔在講，樓宇更加嚴重失修，而且滿布劏房同板間房，居住環境擠迫，衞生惡劣。尤其天台僭建問題更加嚴重，單係青山道一列舊樓已經有十幾間天台屋，部分仲僭建至兩層高添，你話係咪危機四伏吖。

至於第二個特色咯喎，就係充斥大量「特色」行業嘞。大家知啦，舊區龍蛇混雜，麻雀館、遊戲機中心、足浴店……品流複雜，人流眾多，難免增加出事嘅風險。難怪有居民對重建消息喜出望外，慶幸終於有望遷離殘舊住所，唔使再擔驚受怕啦。

講到呢度，不禁令人既喜且憂。喜嘅係見到呢批居民有望脫離惡劣居住環境，憂嘅係無數蟻民仍然被迫棲身於搖搖欲墜嘅危樓，唔知幾時至可以脫困。當局經常呻無地建屋，其實加快重建舊區咪有地囉，一來可以增加房屋供應，二來可以掃除安全隱患，三來可以改善社區環境，一舉多得，點解當局一直歎慢板呢？唔通要等到馬頭圍道塌樓慘劇重演，佢哋至識得緊張？

唔講猶自可，講起把幾火。港府每次提到舊區重建，都話會加快步伐，事實證明根本係吹水唔抹嘴。更令人非議嘅係，市建局愈嚟愈似一個唯利是圖嘅發展商，重建後嘅樓宇十居其九都係豪宅，對蝸居一族根本毫無幫助。功夫茶想提醒市建局，你哋嘅職責係改善社區環境，唔係起豪宅賺大錢呀！

正所謂，萬丈高樓從地起，當局係時候撥亂反正，全盤檢視重建工作嘅成效嘞。如果係政策出問題，就要研究改善；如果係市建局不務正業咯喎，咁就要好好整頓，必要時拆卸重建，千祈唔好畀佢哋淪為日久失修嘅施政危樓吖！