政情:科技局一哥來自警隊?

特首新一份施政報告宣布重設創新及科技局,但具體細節仲未曝光,更談不上定出向立法會「闖關」嘅時間表。不過,資訊科技業界一直對成立政策局「望穿秋水」,依家十畫出現一撇,自然再掀起熱烈討論,淨係正、副局長人選嘅傳聞已經滿天飛。有資訊科技業界消息就話,初步已傳出幾個學術界熱門人選,但最出人意表嘅係,有講法話其中一個有潛力嘅候選人竟然來自警隊添!到底最後會花落誰家呢?

通訊科高層 即將退休

有資訊科技業界消息話,政府正研判各界對創新及科技局正、副局長可能人選嘅接受程度。學術界方面,暫時傳出最少有四名疑似局長人選,包括前年有傳內定為科技局局長嘅理大行政副校長楊偉雄;另外身兼城大副校長嘅賽馬會前資訊科技事務執行總監李惠光、即將離任港大校長徐立之,以及中大工程學院副院長(外務)黃錦輝,三人都係熱門嘅正、副局長人選。

原本正、副局長人選來自學術界都唔出奇,但最新曝光嘅局長人選,竟然來自警隊通訊科高層,消息話此人即將退休,長期參與創新科技範疇嘅工作,加上對政府同立法會運作有一定認識,不失為其中一個可以考慮嘅人選。不過,究竟最終邊個熱門人選可以脫穎而出,依家仍言之尚早,因為先決條件都係要成功落實設立創新及科技局,即係要立法會批准開設新政策局先至得,否則一切只屬紙上談兵。

按政府目前嘅盤算,創新及科技局嘅組成將由現時嘅政府資訊科技總監辦公室及創新科技署為基礎,並會同各界共同制定香港創新及科技發展嘅目標同政策,某程度即係給予資訊科技業界有更大嘅發展空間。

有泛民聲言拉布阻開局

不過,有泛民主派立法會議員早前已批評成立有關政策局只為界別利益,聲言會用盡一切方法反對,甚至重施故技大玩「拉布」戰,即使今次偏向較多泛民議員支持開局,但要通過都相信要經過一番苦戰至得。

第一手消息請下載on.cc東網iPhone/iPad/Android/Windows Phone Apps