中環出更：貿發局春茗 蘇澤光稱不延任主席
貿易發展局主席蘇澤光（Jack So）尋日出席春茗活動時話，今年應該係佢最後一次以呢個身份作東請大家食飯嘞，即係佢唔會再延任，意味新一輪估新任領袖嘅遊戲又要開始。Jack So任期原定去年九月屆滿，但可能冇人能鎮得住個場，所以佢延任咗一年，不過一年眨下眼就快過。
難忘戴妃主持會展開幕
Jack So一九八五年開始已經係貿發局成員，○七年首次被委任做貿發局主席，講起喺貿發局內最難忘嘅兩件事，Jack So話都喺上世紀八十年代發生，其一係查理斯王子同已故戴安娜王妃當年來港主持會展開幕，戴妃仲即刻買咗件穿滿珠仔嘅衫第日着添，會展開幕係香港嘅轉捩點，之後時任上海市市長嘅朱鎔基來港開會，亦都係Jack So負責接待，佢話至今仍印象深刻。
Jack So話，肯聽各方意見最緊要，佢仲講起原來「八達通」卡個名佢都有份諗，事關當時佢同啲朋友傾偈，講起有一張卡嘅設計咁厲害，可以四通八達，不如就叫「八達通」啦，好可惜當年冇去註冊申請專利囉。
卓妮