玩火最怕自焚，自焚就好頭痕，事關後果隨時嚴重到不行。偏偏人類非常之咁鍾意玩火，所以年初二會放煙花，中秋節會點燈籠，膽生毛嘅頑皮仔甚至不顧一切煲蠟，唔少人因此樂極生悲，燒到不似人形。
最近有一宗玩火事故值得大家探討一下，事發現場係尖沙咀棉登徑一間夜店，主人翁係一個調酒師。事發經過大概係咁樣嘅，調酒師自家炮製一款雞尾酒，名稱叫做火燄酒。火光熊熊嘅火燄酒製成之後，調酒師連火帶酒試飲，點知一飲就出事，懷疑酒精濃度太高，喉嚨猶如火燒咁痛，當堂紅腫起水泡，連下巴、面頰同頸部都被高濃度烈酒灼傷。呢一種變相嘅玩火自焚當然唔講得笑啦，所以立即召喚救護車將傷者送去醫院搶救，調酒師要喺深切治療部留醫。
根據香港調酒學校項目總監錢雋永所講，目前較受歡迎嘅火燄酒係「火燄林寶堅尼」以及「B-52」，前者會將酒杯疊高，倒出烈酒再點火，形成一條火柱，賣相十分吸引。為咗避免灼傷，客人飲用火燄酒嘅時候會插入一支長長嘅粗身飲管，吸啜下面嘅酒。至於B-52咯喎，客人可以連火帶酒一啖飲晒。
好嘞，大家嘗試想像一下，假如調製火燄酒嘅時候稍一不慎，會有乜嘢事情發生呢？最恐怖嘅情況係燒着其他易燃物品，跟住就發生火警。之不過問題係，假如發生火警嘅地方居然係無牌經營嘅酒吧，而酒吧所在之地又係消防設施不足嘅工業大廈，你都咪話唔得人驚呀老友！
本報記者不久之前追查發現，有唔少無牌酒吧轉戰工業大廈，盤據觀塘同大角咀一帶嘅工業區，設有VIP房招待熟客。部分工廈酒吧冇掛上招牌，除咗安裝咗閉路電視之外，更加要有人介紹先至可以光顧。熟悉無牌酒吧經營情況嘅人士指出，呢一類隱蔽私竇有機會成為毒禍蔓延嘅溫床。
喂，工業大廈顧名思義只係容許搞工業，搞酒吧自然係違反建築物用途規定。隱蔽私竇有機會成為毒禍蔓延嘅溫床，固然係一個大問題，其實最令人憂慮嘅係安全隱患。你知啦，工廈樓宇設計冇預計同一面積會容納幾十人，一旦發生火警，無論消防設施或者逃生路線都唔足夠，何況光顧工廈酒吧嘅客人話唔定係飲到醉醺醺嘅酒鬼，你叫佢哋點樣逃生脫險呀？
所以咯喎，功夫茶一方面呼籲警方積極執法，唔好再懶懶閒任由無牌酒吧四處開花，另一方面亦懇請酒吧經營者，醉翁之意莫玩火，火燄酒之類嘅玩意唔好亂咁炮製，否則一失火成千古恨！