政情：郭志一開魚場 為海斑留種
立法會議員葛珮帆（EQ）同漁農界議員何俊賢（高佬賢）前日搞咗個新春團拜，期間又帶大家去參觀流浮山一個本地水產養殖場。呢個講求環保嘅海斑魚場，內裏唔止有石斑，仲有龍躉，場內又有一套非常完善又環保嘅飼養系統。
原來呢度係永安百貨執行董事郭志一嘅主場，郭志一話，佢搞呢個養殖場純粹係基於自己嘅興趣同理念，絕對唔係為咗賺錢咁簡單o架。
郭志一自小就周圍潛，同海入面啲魚結下不解緣，所以話面對中國同香港等華人地區因飲宴，對海魚嘅大量需求，佢擔心石斑、龍躉呢啲魚會瀕臨絕種，所以開個養殖場，希望有朝一日養嘅魚量可以供應到畀香港市場之餘，又可以將部分放番入海，嚟維持生態平衡。
農場製七彩花籃
高佬賢同EQ前日除咗講到漁業發展問題之外，仲請埋元朗一個有機農場嘅場主佘常光嚟展示一籃五顏六色嘅有機蔬菜。高佬賢見到就即時笑住咁話，以為係假嘢，皆因未見過啲菜可以包得咁靚，下次可以考慮送人菜籃，唔使送花籃喎。