出席論壇 李遭圍插
不過，立法會議員黃毓民尋日就喺由佢主持嘅網台節目上踢爆李慧玲「被炒」三大罪狀，包括李慧玲主持嘅節目收聽率下降、喺節目中多番批評商業電台，同埋準備過檔由黃楚標為大股東嘅香港數碼廣播（DBC）。不過，李慧玲同日出席《城市論壇》時矢口否認搵到其他工。
中原集團創辦人施永青同時事評論員劉銳紹都認為，凡事都應該提出證據，施永青更透露旗下報章時有抽廣告情況，不過佢唔會將事件提升至言論自由層次，又暗寸李慧玲唔應該隨便扣人帽子。論壇現場就有廿幾個觀眾起晒哄，認為商台炒李慧玲炒得啱，又鬧佢係「臭口玲」，搞到李慧玲最後要差人護送離開。