政情：林村盆菜宴 陳恒鑌「發晒光」
香港客屬總會尋日喺大埔林村搞咗個新春盆菜宴，有約六千人參加，新界西立法會議員陳恒鑌（Ben）着得非常應節，佢着咗件唐裝，金光閃閃。阿Ben話，佢件賀年裝喺香港買嘅，過新年，點都會準備一、兩套衫應吓節。遠道由港島而來嘅立法會議員鍾樹根就好唔同，佢着咗件飛機恤，非常休閒。
講番個盆菜宴，坐喺主家席嘅前漁農界立法會議員黃容根話，其實盆菜入面放乜餸都得，傳統嘅有門鱔，而富貴啲就有鮑魚囉，佢尋日就有鮑魚食嘞，又話最重要係盆菜代表喜慶喎。代表港府出席嘅教育局局長吳克儉就形容自己係大好友，所以任何人請佢，佢都會到，但又尤其鍾意食盆菜，仲分析話有啲盆菜有腩肉、有啲有門膳。
講到對盆菜幾咁有研究咁，今次港府派出呢位同客家拉唔上關係嘅吳克儉局長出席盆菜宴，唔通係佢自己舉手話要嚟嘅？