政情：泛民假公濟私

學民仔唔想畀白鴿洗底

學民思潮提出就普選嘅原則性問題舉行公投，等政府提出政改方案時就可以用公投結果決定係咪支持同佔領中環。民主黨（白鴿黨）立法會超級議員何俊仁早前都已經講咗願意辭職，之但係學民思潮就話要五區總辭，激進派同其他泛民議員仲爭先恐後附和，驚死冇得辭職。有泛民中人就透露，學民思潮要「玩」晒五區，其實係唔想畀二○一○年走入中聯辦嘅白鴿黨有機會洗底，更加唔想畀佢哋獨領風騷。

據了解公民黨（公文袋）已經為公投做好準備，佢哋港島區立法會議員陳家洛一直對前年未能與黨友陳淑莊（Tanya）雙雙入立法會而耿耿於懷，如果佢辭職，Tanya就可以重返立法會，佢下屆再選亦有籌碼在手。而九龍東方面，就由梁家傑辭職，等棄守東涌、留守九龍東嘅飛機師譚文豪可以提早接班。

人民力量立法會議員陳偉業亦一早講咗可以為公投辭職，不過由於佢哋搵唔到合適接班人，所以會由公文袋「代勞」。公文袋新界西議員郭家麒辭職，佢哋嘅黨主席余若薇就會參加補選。不過，聽聞該黨毛孟靜唔捨得辭去九龍西議員職位，所以該區就會由議員黃毓民辭職，等被視為毓民徒弟嘅黃洋達上位。

人力社民連爭奪新界東

而五區之中競爭辭職最激烈嘅就係新界東。前年立法會選舉為該區票王嘅社民連梁國雄就有意退落嚟，畀佢助理黃浩銘接任。但人力亦都有意將陳志全（慢必）換番落嚟，畀主席袁彌明踏入立法會。以佢哋嘅名氣，慢必二○一六年想選嘅話再轉區都唔遲。

政府當初幾經辛苦先令立法會遞補機制喺立法會通過，估唔到最後竟然演變成幫各黨派免費更換接班人。世上竟然有咁筍嘅事，睇嚟今次五區公投都係勢在必行o架喇。