中環出更：高永文預告 就快有活雞食
食物及衞生局局長高永文日日都咁忙，尋日晨早跑完馬拉松領袖盃，中午立即應老友前民政事務局常秘、「眾人媽打」李麗娟之邀，去媽打母校瑪利諾修院學校參加籌款盆菜宴。食盆菜唔少得雞，雖然係冰鮮雞，高永文都食到舔舔脷，佢仲話只要呢兩日相安無事，聽日禁雞令屆滿後，本地活雞一定有得應市，到時市民就有雞食咁話。
內地禽流感爆到七彩，市民最關心幾時有活雞食。高永文就話，內地雞雖然有啲阻滯，但本地雞好太平，只要呢兩日相安無事，本地活雞一定有得應市喎。不過前漁農界議員黃容根就話，依家本地養嘅大隻雞成本係四、五十元，但政府只係賠卅元一隻，呢個賠償係二、三十年前訂落，真係通脹都追唔上。
講返食盆菜，跑完馬拉松趕嚟嘅仲有前行政會議成員「金刀梁」梁智鴻，可能又凍又餓，盆菜一上枱，佢立即第一個裝飯食。梁太馮令儀就第二年陪老公支持媽打為母校籌款，真係夫唱婦隨喇。
卓妮