中環出更：啟剛帶隊 青聯遊霍家「大觀園」
香港青年聯會主席霍啟剛（Kenneth）前日喺薄扶林沙宣道霍家大宅舉行新春團拜，招待一班聯會嘅兄弟姊妹，青聯元老級大哥黃定光伉儷、前主席李宗德、許華傑、陳仲尼、葉振都及會中核心成員近百人均賞面出席，唔少嘉賓都係第一次踏入霍家大宅石頭莊園，呢度成間博物館咁，令人大開眼界。
主人家一盡地主之誼，預備豐富嘅自助晚餐招待賓客。啟剛話，過往香港青年聯會嘅新春團拜都係由幾個屬會分別舉行，為咗可以減輕秘書處及會員嘅壓力，佢今年就提議由總會統籌舉辦一次大團拜喇，不過霍太郭晶晶同囝囝當晚就未有出席。
今次啟剛喺嘅屋企搞青聯嘅新春團拜，除咗可以慳返場租外，仲令大家感覺更親切，出席嘅嘉賓都大讚呢座堡壘式嘅大宅氣派非凡。呢座建於上世紀三十年代、由啟剛爺爺已故前全國政協副主席霍英東買下嘅霍家大宅樓高四層，從街外睇，屋嘅外牆鋪滿綠色植物，而主大樓入口外面，就擺有一對幾乎有兩個人咁高嘅石獅子，外形威猛，入面仲有一個約七人足球場大小嘅草地花園，擺放咗兩尊古董大炮。
主人家今次喺露台同會客室安排十多圍枱招呼嘉賓，會客室內，牆壁、窗簾同傢俬等都充滿歐洲傳統色彩，而露台酒吧就有鍾馗像同大理石噴水池，總之大宅內古今中外珍品好多，卓妮今次嚟參加團拜，未暇仔細參觀。
卓妮