香港人經常批評內地人不文明，亂丟垃圾又有，排隊打尖又有，隨處便溺更加係令人反胃作嘔。冇錯，部分國內同胞好多時候行為舉止的確令人側目，之不過咁喎，香港有部分人士其實都唔係幾文明，所謂嘅中港矛盾有時係五十步笑一百步嘅咋。
大家上網睇睇吖，有人搭小巴嘅時候竟然起飛腳踢司機，又有人送車尾搭唔到巴士，居然惡死到施展人臂擋車，路上截停巴士之後再夾硬開門，簡直就係霸王硬上車。野蠻事件陸續有來，一艘郵輪忽然之間被佔領。
郵輪被佔領事件係咁嘅，搭船去外國旅行嘅本地遊客不滿行程安排，認為船公司搵笨，郵輪回港泊岸之後拒絕落船，以一種另類騎劫嘅姿態要求賠償損失，一搞就搞咗十幾粒鐘。好衰唔衰，佔領郵輪嘅遊客之一係立法會尊貴議員，聽講佢係為咗選票而忽然正義，一時之間成為旅霸爭取利益嘅民意代表。
見到咁騎呢嘅賴死唔肯落船，如果你係其他郵輪經營者，你會點諗吖？好明顯啦，你會對香港失去信心，話唔定以後唔敢喺香港泊岸，避之則吉吖嘛。
嗱，唔係危言聳聽，香港人霸船十幾小時，已經引起國際郵輪公司極度關注，將會開會急商對策。國際郵輪公司最擔心嘅係本港警方接報登船之後仍然束手無策，任由郵輪被遊客佔領。如果特區政府對霸船行為無可奈何，郵輪公司毫無保障，日後或者考慮減少甚至放棄郵輪航線中途停靠香港站。
喂喂喂，香港嘅郵輪碼頭剛剛先至啟用，香港嘅郵輪業務剛剛先至起步，萬一國際郵輪公司真係拒絕泊香港嘅碼頭，會唔會造成嚴重嘅經濟損失呀？
若然同類事件發生喺外國，人哋嘅警方有權要求佔領者離開。至於內地咯喎，執法部門更加可以採取行政拘留行動，即時將旅客拘監十五日。本報記者曾經向警察公共關係科查詢，不過可惜吖，警方只係回應話冇補充，重申當日接獲求助，有旅客唔肯落船，到場發現係雙方糾紛，現時已經結案。
所以話啫，國際郵輪公司嘅擔心唔係杞人憂天，警方假如疏於執法，真係會令人信心盡失，話唔定就此放棄香港站，到時候咯喎，郵輪碼頭拍烏蠅，咁就喊得一句句。
聞說，政府將會同外國郵輪公司解釋事件，同時希望郵輪公司做好應變措施，妥善處理同旅客嘅糾紛，郵輪業諮詢委員會稍後亦會討論事件。
計功夫茶話齋，政府同郵輪業諮詢委員會真係要諗清諗楚，點樣處理以及防範日後嘅佔領行為，否則，搞到香港蒙羞，旅客卻步就唔好啦！