政情：教院正名又要等五年?!
香港教育學院爭取正名做大學已經好多年，記得前校長張炳良○八年上任時已開出期票話三年後就可以正名，點知三年又三年都未能兌現，一味話「指日可待」，待到佢前年年中提早解約準備加入政府前都未搞掂，仲要將個波踢咗畀教育局局長吳克儉。去年九月上任嘅教院新校長張仁良，尋日首次主持傳媒春茗敍會時又開期票，話教院正名已進入直路，但實際上要五年內先至完成，真係得啖笑。
張仁良去年接任校長後，曾表示協助教院正名係其中一項重要工作，佢尋日喺春茗敍會時話，嚟緊四月香港學術及職業資歷評審局（評審局）人員將會到教院實地考察，就人文學同社會科學等非教育學科進行評審。張仁良形容，評審有如「照肺」，專家團隊將就行政同教學逐一檢視，對院校嚟講就好似打仗咁，依家正忙於輔導教學人員，希望院校上下係全力以赴，做到最好。
過完評審局 又等教資會
當過完評審局嗰關，預計最快年底，又到教育資助委員會展開院校檢討程序，講到呢到，終於到戲肉。張仁良話，如果全數通過嘅話，相信政府再冇任何理由唔畀教院正名，教育局同行政會議就冇藉口唔拍板咁話，咁就寄望五年內可以成事。大家冇聽錯，係五年，五年後即係二○一九年，如果有幸通過政改方案，下屆特首已由普選產生，但教院仲喺度講緊正名大學，真係難怪啲教院學生會咁憤怒。
增校推計劃吸傑出學生
除咗正名外，教院亦要提升教師質素，而過往成績突出嘅學生未必願意教書。為咗吸納一批有志做老師嘅傑出學生報讀，張仁良話準備推出一個校長推薦計劃，初步計劃每個成功獲推薦嘅學生可以獲得一萬元獎學金，希望每個辦學團體最少提供十個名額。
至於該校畢業嘅教師英文水平備受關注，張仁良話，為咗提升學生嘅英語水平，下學年將會搞一個國際舍堂導師計劃，邀請一班海外大學畢業嘅外籍人士做舍堂導師，令學生喺宿舍都要講英文，好似困獸鬥咁，希望為學生締造英語環境，將來去國際學校教書都唔驚啦。