泛民主派內訌愈演愈烈，連過往情同兄弟嘅《蘋果日報》同民主黨（白鴿黨），近日亦疑似鬧翻咗，互相撰文筆戰數臭對方。《蘋果》喺上周六發表社論，話泛民就政改問題分裂嘅底因，係白鴿黨唔肯力撐「公民提名」；又話白鴿黨成員早前為「佔領中環」行動誓師，正正反映市民唔信任該黨；該黨成員喺誓師儀式上被「佔中後援會」狙擊掟嘢，實屬「咎由自取」喎。
白鴿黨總幹事林卓廷尋日就代表黨作出反擊，發表洋洋千字嘅嚴正聲明，點名批評該篇《蘋果》社論及作者李怡歪曲事實、顛倒是非、惡意攻擊該黨。佢強調該黨一直支持佔中，佢哋最後支持乜嘢政改方案同會否佔中，須視乎佔中運動稍後舉行嘅兩輪電子公投結果，《蘋果》社論同李怡唔質疑佔中後援會「騎劫」同「破壞」佔中，反而質疑積極佔中嘅白鴿黨，「道理何在？」
林卓廷又喺文中指出，上月十五日同樣由李怡執筆嘅《蘋果》社論，曾清楚指出真普選聯盟召集人鄭宇碩無講過公民提名係「缺一不可」，但短短一個月後就唔記得咗自己寫過乜，改為暗批白鴿黨違背真普聯嘅「缺一不可」立場，「實在善忘」。呢場泛民政改內訌鬼打鬼大混戰，真係愈睇愈精彩。