中環出更：潮人揭秘 慈山寺防彈迎接斯國總統
新春伊始，潮籍商界日前舉行團拜，逾百「家己冷」喺上環總壇歡聚一堂，共慶新春。同場講起耗資十億元興建嘅大埔洞梓慈山寺裝有超級防禦設施，包括電網圍封、防彈爆破牆壁及防彈門窗，非常神秘。有份籌建慈山寺及青銅觀音像嘅潮屬社團總會前主席莊學山透露，慈山寺咁嚴密嘅布防，目的係為超級貴賓而設。邊個係超級貴賓？原來係斯里蘭卡總統拉賈帕克薩（MAHINDA RAJAPAKSA）。
莊學山話，早前斯里蘭卡總統送贈一批佛教聖物畀慈山寺，若然對方日後到訪，當然要提供「一級保護」，萬一總統有乜差池，真係擔當唔起喎。佢又透露，寺內早前發生一場小風波，話說寺方發現地台鋪得唔平，令漿水滲出，幸好近日已完成重鋪地台，等法師擇好吉日，可望喺今年內對外正式開放。唔知屆時會否邀請斯里蘭卡總統出席開幕禮呢？
政商團拜 祝願爭拗少
潮籍猛人多，當日「潮人」空群出席團拜，除咗莊學山、潮屬社團總會主席陳幼南、飲食界張成雄、珠寶業界胡劍江等潮界名人外，年輕一輩就有康泰旅行社總經理黃進達，又請到咗同為潮人嘅食物及衞生局局長高永文同發展局局長陳茂波出席。高永文大晒流利「潮語」同鄉里拜年，陳茂波就只係用廣東話版賀辭，祝願港人團結少爭拗，和氣生財。
馬年經濟市道，都係團拜熱話之一，張成雄話，睇好內地經濟增長平穩，香港都會繼續受惠。搞開珠寶生意嘅胡劍江就進軍美國，去年投資逾三十億港元喺美國佛羅里達州、德州及加州等地狂掃七百多間房屋，目標係買夠一千間，佢話淨收租都有八厘回報，吸引過投資香港樓市喎。
卓妮