政情：郵輪風芸
言行向來惹火嘅立法會議員蔣麗芸（阿Ann），因不滿佢自己參加咗嘅郵輪團「爛尾」，未能停泊其中一個目的地越南下龍灣觀光，周三抵港後率領逾四百名團友「佔領郵輪」逾十五小時，要求旅行社賠償多達七成團費，又再引起爭議。有網民揶揄阿Ann平日高舉反對「佔領中環」旗幟，自己遊埠就「旅霸」上身「佔領郵輪」，同樣以少數民意脅迫大多數團友意見，質疑佢先係佔中代言人。不過阿Ann嘅黨友就一如既往力撐佢，仲大讚外號「元秋」嘅阿Ann，係名副其實嘅「女俠」而非「旅霸」添！
聲稱佔船為民請命
除咗網民鬧爆，有參與行程但冇留守抗爭嘅團友，尋日亦打電話上電台，直言事件只係意外，對阿Ann等團友嘅行為感到「羞恥、醜怪」，認為船長已經盡力嘗試泊岸，團友有不滿大可循正常途徑去消費者委員會投訴，點都唔應該「佔領郵輪」。阿Ann就解釋，若果佢係普通團友，可能一早已經落咗船，但身為為民請命嘅議員，又點可以不顧而去呢？佢又否認留守嘅團友係「旅霸」，強調事件唔可以同佔中相提並論。
不過，阿Ann嘅一片苦心唔係個個都撐，經常坐郵輪環遊世界嘅藝術發展局主席王英偉（Wilfred）尋日出席一個新春活動時就強調，一般遠洋郵輪設施都相當齊全，就算團友因意外落唔到船玩，相信船上都有足夠娛樂設施畀佢哋消磨時間，唔會「漂浮」海上冇嘢做。
譚耀宗鍾港武齊撐
與阿Ann同屬建制派嘅立法會議員馬逢國亦話，當時自己唔在場，好難講邊個啱邊個錯，但始終「霸住個地方唔係幾好」，假如佢喺船上，就會建議團友落船再向消委會追討喇。
好彩阿Ann仲有多位忠實黨友支持。民建聯主席譚耀宗（阿譚）力撐阿Ann唔肯落船係應團友要求，幫手協調，強調身為議員唔能夠置之不理。同屬民建聯、當年有份同阿Ann一齊參選嘅油尖旺區議會主席鍾港武，更形容阿Ann唔係「旅霸」，而係「女俠」，強調阿Ann作為議員，見到有嘢需要幫手，自然會使命感「上身」，如果阿Ann當時一走了之，肯定又會畀人質疑佢係咪同旅行社關係密切，惹來偏幫大財團、甚至官商勾結疑雲等，「幫又唔係，唔幫又唔係」喎。