中環出更：汪阿姐暗批泛民阻住晒
建制派議員早前喺立法會工務小組委員會否決香港電台新大樓撥款，被泛民主派質疑有政治動機，其實以泛民為首嘅多名議員，早前亦曾兩度聯手否決前身為油麻地戲院嘅粵劇戲曲中心擴建計劃，原因係不滿擴建計劃包括將露宿者之家興建喺垃圾站上面，好似當啲露宿者係垃圾喎。受擴建計劃「煞停」影響嘅八和會館，其主席汪明荃尋日就係八和新春團拜上發火，暗批泛民議員搵嘢嚟講，並且要求政府喺馬年「快馬加鞭」重推擴建計劃。
「豪宅隔籬都有垃圾站」
講嘢向來直腸直肚嘅汪阿姐，尋日喺團拜上不點名批評有份投反對票嘅議員，強調露宿者之家現址都已經係靠近垃圾站，搬新竇後反而會有更好嘅居住環境。佢又話香港一向地少人多，唔少千萬元豪宅隔籬都有垃圾站，炮轟反對撥款嘅議員冇全盤考慮擴建方案，影響香港粵劇發展。
本身亦係泛民一員嘅民協主席廖成利（老虎仔），尋日喺團拜活動上，向出席嘅港府高官送上兩張印有民協嘜頭、寫住「馬上普選」同「馬上擴建」嘅手寫揮春。原來老虎仔做咗八和法律顧問已有十年，一直支持戲曲中心擴建計劃，佢黨友議員馮檢基又咁啱唔係工務小組成員，冇份否決擴建撥款，因此今次係抽水有理，唔使怕面懵！
卓妮