中環出更：政商名人新春茹素積福
香港三德弘法中心前晚舉辦新春祈福法會及千人素宴，好多政商界名人都去食齋積福，包括「翡翠皇后 」帝皇翡翠行政總裁董吳玲玲、中成藥商會主席黃楚恒（Stanley）及太太黃陳嘉妮，仲有Stanley嘅媽媽中華總商會婦委會副主席黃周娟娟等人，場面好墟冚。
卓妮見到神采飛揚嘅董吳玲玲，原來佢已卸任晋江同鄉會會長，同時榮升福建社團聯會永遠名譽主席，所以最近多咗時間陪家人及旅行，唔怪得咁精神。董太笑言自己天生係佛教徒，因為佢係觀音誕嗰日出世。董太又話，信佛教唔一定要食齋，佢亦唔食長齋，但係生日當天一定會食以示誠心。
四年抱四 黃楚恒有福氣
卓妮又見Stanley太太身懷六甲，細問之下，原來係佗住對孖胎，預產期喺六月。Stanley話，其中一個BB已知係囝囝，但另一個未知住，不過係男係女都冇所謂，皆因今次係佢哋嘅第三胎，計埋呢對孖B，共有四位子女，而且係「四年抱四」添，唔怪得之當晚笑得咁開心。
茹素多年嘅民政事務局副局長許曉暉（Florence）都有到場，佢話小時候喺農村見到兔仔畀磚頭砸死，覺得好可憐，長大後就開始食素。
佢兩名囡囡都係素食者，不過有一次阿囡喺學校學到食物金字塔，知道適量肉類對身體有益，返屋企就問佢點解佢哋唔食肉。Florence冇被問倒，佢舉例羊仔一家人若畀人食咗，咁就唔完整，加上細心解釋，囡囡最終都明白。
當晚仁濟醫院吳志斌及吳國榮等一班總理們亦齊現身，事關吳志斌係當晚活動嘅統籌，所以請埋仁濟一班善心人士齊去護持今次活動，齊齊食素淨心積福。
卓妮