政情:今日你上鏡:林鄭做大嘥鬼教壞細路

餐飲業四大商會為響應「築福香港」運動,尋日喺荃灣一間酒樓宴請逾百位長者飲杯茶、食個包,身兼扶貧委員會主席嘅政務司司長林鄭月娥出席陪食。不過「築福香港」尋日接連安排兩場活動,林鄭畀足面由灣仔趕到荃灣,遲晒大到,成班長者面對眼前美食睇得唔食得,認真陰公。林鄭趕到現場後即宣布起筷,冇招呼同枱等咗佢好耐嘅公公婆婆,就自己大啖大啖係咁食,最後食剩個包同蘿蔔糕就走人。新正頭就帶頭做大嘥鬼,認真教壞細路。