泛民議員透露，美國駐港領事館上月廿三日邀請泛民議員涂謹申、何秀蘭、郭榮鏗、梁繼昌同莫乃光食晏，席上除咗有美國駐港總領事夏千福之外，仲有四位美國國會議員，再加上七至八位領事館職員，總共有成十幾個人。夏千福履新後動作多多，仲成日約會政界人物收集意見，唔通有外國勢力想喺背後攪局？
雖然今次飯敍陣容好勁，但據悉會上無乜點傾過政改問題。美國國會議員只係向泛民議員問吓香港近來有乜大事件，同埋立法會嘅運作及組成辦法。當佢哋知道原來香港立法會有功能組別同地區直選兩種時，都覺得好特別。
夏千福上任以來，活躍程度同曝光率已經冠絕之前幾任美國駐港總領事，佢除咗落區大打親民牌、四出向多個政黨政團領袖收風外，又主動評論香港普選，引起中方猜疑。夏千福今次又相約五位泛民立法會議員共進午餐，但就扮低調，唔敢再喺官網上張揚，莫非佢因為前排畀外交部駐港特派員宋哲點名警告，所以唔敢再亂講嘢？