中環出更：港台團拜 局長建制議員冇影
商務及經濟發展局上星期決定擱置香港電台將軍澳新大樓撥款申請，依家大樓興建無期。尋日港台搞新春團拜，點知唔見商經局局長蘇錦樑（Greg）蹤影，一班反對港台新大樓撥款嘅立法會建制派議員亦缺席，唔通大家因為撥款而搞到面左左？
卓妮問過港台，港台就話同局方好似「一家人」，所以唔使發出正式邀請。自從上年開始，佢哋縮短團拜形式，淨係邀請廣播傳媒同業，局長就開始冇出席，由廣播處處長鄧忍光代表主禮，至於立法會就淨係邀請資訊科技及廣播事務委員會委員。
泛民得莫乃光現身
話時話，委員會有廿二個委員，當中十個係泛民，但係只得支持撥款嘅資訊科技界泛民議員莫乃光現身，九個泛民「no show」。
卓妮搵咗幾個冇去嘅民建聯議員問下，其中鍾樹根話撞咗地區團拜活動，揚言應酬地區緊要過應酬官，唔去唔係針對港台。至於葛珮帆就話只係冇時間，強調唔出席同撥款一事冇關，仲話佢未做議員之前，都成日以港台顧問委員會成員身份出席喎！
卓妮