「嗰日搭車，突然好奇睇吓個乘客須知，點知見到佢寫住係叫人『請盡量移玉到車廂內部位置』，係咪寫漏咗個步字呀？」孫小姐質疑九巴「是是但但」，出示須知時未有做好校對工作，要求九巴盡快糾正。

九巴發言人指出，現時所有巴士車廂均貼有「乘客請注意」標貼，清楚列明乘客於巴士上需遵守的規則，其中第（一．三）項中指出「上車後，請盡量移玉到車廂內部位置」。根據「漢語詞典」，「移玉」乃敬詞，為「請人前來或前往、挪動腳步」的意思。

「雖然九巴唔係寫錯字，但貼得張通告出嚟，唔係應該清楚、易明嘅咩，點解好似搞到要引經據典先睇得明！」孫小姐又指現時九巴網頁，乘客須知已改為「請盡量移步」，質疑九巴「有錯唔認」。