政情：公民講場：阿芸對阿雲口水淹立會

立法會尋日有兩舊雲發生口水大戰！工務小組委員會尋日繼續開會討論政府擴建油麻地戲院撥款申請，以及重置露宿者之家及垃圾站事宜。議員蔣麗芸（Ann）自稱曾實地研究，亦問過露宿者，佢哋都希望可以快啲搬離依家惡劣嘅環境，所以認為反對撥款嘅議員只係想爭政治本錢。之後反對嘅黃碧雲（一舊雲）就反駁阿Ann，話佢不知所謂，因為露宿者點會有選票？又話最唔鍾意啲人扮科學、扮調查同扮落區喎。阿Ann聽到就頂唔住頸咁鬧番一舊雲，話佢係咪生活喺太空，因為講嘅說話全部係假大空。兩舊雲就係咁拗嚟拗去，其實拗埋啲無謂嘢，對件事又有乜幫助呢？