唔少政黨向來都有搞籌款宴會，希望活動令新知舊雨聚首一堂之餘，又可以乘機籌款。由泛民主派政團組成嘅真普選聯盟（真普聯）向來面對財困問題，據聞佢哋最近決定有樣學樣，喺五月中舉行籌款晚宴，仲要筵開廿幾圍咁多。不過，佢哋暫時決定晚宴「買枱」只限聯盟成員，拍賣環節亦唔會公開畀街外人競投，但班成員過去咁孤寒唔肯科水，睇嚟佢哋嘅籌款大計隨時蝕渣米。
真普聯嘅財政經常乾塘已經係公開嘅秘密，加上佢哋下月將會搵香港大學進行第三次民意研究，調查市民對普選特首「三軌方案」同公民提名嘅支持度，預算額外用多八至十萬元。開支咁大，真普聯於是積極「開源」搵多啲錢，前日開會敲定喺尖沙咀童軍總會附近酒樓舉行籌款晚宴，但初步計劃唔會倣效佔中秘書處搞名人飯局容許街外人報名，淨係畀聯盟成員「買枱」後邀請嘉賓參與晚宴。
真普聯只限自己人參加，即係等於「羊毛出自羊身上」，佢哋班聯盟成員過去已唔多願意上繳遊行街站籌得嘅款項，依家又搞晚宴揼自己人心口，如果到時反應冷淡又冇乜人拍賣品，驚唔驚最終埋單要倒貼呢？