政情：李嘉誠捐美大學逾二千萬
李嘉誠基金會日前向美國史丹福大學捐款三百萬美元（約二千三百多萬港元），資助該大學研究如何利用龐大的生物醫學數據庫，改善人類健康和減低醫療成本。史丹福大學醫學院院長Lloyd Minor醫學博士話，醫學界中有大量數據，包括病人電子病歷紀錄、DNA序列分析、疾病機制的生物數據等，而基金會捐款能令大學進一步利用龐大嘅數據庫，尋求創新嘅醫療方式，惠及更多病人。
助研生物醫學 造福人群
「大數據」一向被視為生物醫學科學嘅下一輪革命，喺有助減低成本嘅同時，亦可加快開發新藥，以及為病人提供更佳嘅個人化療程。李嘉誠話，醫學發展已面臨重要關口，善用「大數據」嘅驚人潛力，有望徹底改變生物醫學科學嘅未來。
史丹福大學醫學院除咗研究「大數據」外，李嘉誠亦為幾個大學主要研究項目提供協助，至今已出資三千七百萬美元（約二億八千七百萬港元）支持醫學院一系列項目。而基金會至今已捐助逾十八億五千萬美金（約港幣一百四十三億五千萬港元），資助全球各地嘅項目發展，其中重點支持教育同醫療創新項目。