政情：攆出議員榜 公文袋摺得？
身為立法會議員，除咗要深得民心之外，知名度都要保持番咁上下，否則幾高民望都唔使旨意打入「十大議員排行榜」。唔係講笑，香港大學民意研究計劃近日做完新一輪「十大立法會議員」評分，各大泛民主派政黨都有人佔一席位，但唯獨公民黨（公文袋）梁家傑就突然跌出十大，亦令該黨冇人喺十大排行榜上。點解？咪係該黨知名度低囉，如果呢個調查結果伸延到去選舉，隨時一鋪清袋。
港大呢個「十大議員排行榜」，首先喺未經提示下調查最多市民提名嘅十二位議員，然後再進行下輪評分。
認知率低 評分都冇
因為梁家傑嘅市民認知率相當低，所以連評分都冇機會，跌出十大議員榜，其位置由新民黨田北辰取代。而今次民調係喺一月十六至十九日進行，即係施政報告發表後三日，照計梁家傑批評施政報告咁狠，市民冇理由唔認得佢，除非市民當佢發噏風嘅啫。
按過往港大民調結果，梁家傑民望一直係黨內之首，而「十大議員」評分中，佢經常排喺第四、第五位，成績算係中游分子，但佢今次一下子被踢出十大，相信民調結果已對該黨前途敲響警鐘。
今次「十大議員榜」榜首依然由立法會主席曾鈺成蟬聯，有五十九點四分，第二位及三位分別係新民黨葉劉淑儀及田北辰。十大議員中，頭四位屬於建制派，之後六人就屬泛民，唔知係咪代表「黃金六四比」仍然存在呢？值得一提嘅係激進派議員如陳偉業、黃毓民同梁國雄同樣打入十大。
港大民調有一個特別地方，就係將「十大議員」評分同認知度掛鈎，如果議員知名度不足，就算幾高分都唔能夠打入「十大議員榜」。喺呢個制度下，民主黨涂謹申同民建聯譚耀宗就因為認知度低而被剔除。嘩，兩人從政廿幾年，又係黨內數一數二人物，經歷無數選舉，但原來喺市民心目中認知度係咁差，唔知佢哋有咩感受呢？