政情：老師搞「革命」教協內訌
教師搞「革命」，香港教育專業人員協會（教協）出現內訌？任職教協理事會十多年嘅老臣子韓連山尋日宣布連同十八名中小學、大專界、退休教師組成「進步教師同盟」（進師盟），破天荒以同盟形式參選新一屆教協監事會，話一旦當選要全力推動改革，一改以往理事獨大嘅作風。尋日一班進師盟成員力數教協，話教協近年立場愈嚟愈保守，令唔少年輕教師失望，有成員更批評教協喺重大社會議題上反應遲鈍，立場模糊，令人覺得變成某政黨B隊。
被斥保守遲鈍 立場模糊
教協理事會及監事會兩年一屆嘅任期四月屆滿，二月下旬至三月中會就新一屆理事、監事進行投票。今年有三十幾人競逐十九個監事會席位，新組成嘅「進師盟」除咗韓連山外，仲有曾高舉「我要有權選特首」紙牌嘅吳美蘭等一批前線教師。聽聞教協副會長張文光亦會由理事會轉戰監事會，同「進師盟」一較高下。
教協出現意見分歧並非一朝一夕，「進師盟」尋日力數教協近年立場愈來愈保守，好似國民教育科爭議上，教協未有帶領老師，發揮團結力量；林慧思事件上亦昧於形勢，反應遲鈍。韓連山慨嘆話，過去幾年教協理事內保守聲音獨大，好似開會時曾就特首選舉提名「三軌制」討論，但最終決定刪除「缺一不可」嘅字眼，擔心如果教協維持現狀，二○一七普選方案只會跟隨某政黨嘅意見，所以今次決心走出嚟，希望可以監察到理事會。
其實除咗政治議題外，呢班前線教師對於教協「往績」亦唔係咁滿意，話教協爭取多年改善幼稚園教師嘅教學條件同工作待遇多年，但同工感受唔到教協長期標榜嘅團結力量；而大專界學術自由、大學學額嚴重不足等問題，現屆理事亦充耳不聞。
馮偉華：向來聽會員意見
就以上指控，教協會長馮偉華回應話好唔公道，佢話明白少數會員對教協有意見分歧，但教協向來按照大多會員嘅意見行事、更唔同意話佢哋反應慢。佢話好似國教風波，教協早於一一年已表明反對諮詢文件，教協唔係落後形勢，只是唔會採取冒進、偏激行動。