中環出更：葉劉 陳智思 合作學術交流
新民黨近日銳意同新界東地區勢力公民力量「談婚論嫁」，非常進取，主席葉劉淑儀為求壯大勢力，近日連美國大學都唔放過。原來佢上星期二同着重博雅教育嘅波莫納學院（Pomona College）商談同匯賢智庫合作計劃，香港知名校友、行政會議成員陳智思都列席，呢兩名疑似來屆特首參選人一齊合作，唔知會唔會擦出乜嘢火花呢？
陳為波莫納學院校董
葉太早幾日喺facebook上載咗張佢、波莫納學院成員同埋校董陳智思嘅合照。佢話會上雙方傾到以匯賢智庫為平台，邀請該校學者來港演講，介紹民主理論、科技發展、以及西方各類學術同理論等。而該校教授亦可以來港，到匯賢智庫學苑教授東亞文化、西方歷史等暑期班，進行關於教育議題嘅研究項目。
葉太又歡迎該校學生來港到匯賢智庫或新民黨實習，或者新民黨挑選年輕人到該學院做交流生，話呢次會面有益及有建設性，未來仲有好多交流機會同合作空間添。
卓妮