政情：留學遇癡漢 蔣麗芸啞忍
本港接連發生外傭被虐待事件，勾起立法會議員蔣麗芸（Ann）喺加拿大留學時遇上癡漢嘅不快回憶。阿Ann話，當年佢喺加拿大讀大學時，有次逼巴士途中遇到有個男人特登行埋佢度「揩油」，佢原本都打算報警，但因為自己係二等公民，擔心去到警署冇人理、甚至被人蝦，所以就好似嗰位被虐待嘅印傭咁唔敢報警。佢話好明白印傭嘅感受，亦更加覺得要爭取港鐵有女性專用車廂。
雖然阿Ann講到自己讀書時好驚青，但係佢尋日喺立法會政制事務委員會政改公聽會上就同議員黃毓民「駁火」。
今時唔同往日
話說毓民就寸與會嘅政制及內地事務局副局長劉江華係「哨牙仔」，阿Ann於是幫口反指毓民係「豆沙喉」，加上佢之前多次喺各大小會議同泛民主派議員激辯，真係好難想像阿Ann曾經係怕事少女囉。如果時空交錯，當年嘅巴士癡漢見到阿Ann同毓民駁火呢一幕，相信都唔敢抽阿Ann水喇。